نص القصائد

يا ليبيا قرر اليوم شبابك

قصيدة للشاعر الحاج محمد السيفاط

للأستماع للنشيد: فرقة شباب الجبهة

يا ليبيا قرر اليومْ شبابكْ	سحْقَه اللّى باعَدْ جميع احْبابكْ

قــرَّر حَــرْبــه	وقَرَّرْ الموت وْلا حَياة الْغرْبَه
خْيار الفتَى يَعْملْ عملْ يَفخرْبَه	وَالاّ يْموتْ في شانكْ وْشان عَذابكْ
اليومْ باقيَهْ كيف الصّعود الجربَه	بين الجّفا والكبرْ، طال سْيابكْ

يـاالـعَـزيـلـه	حَياتْنا بلاك مْبهدلَه وْذليلَه
حقك علينا نهجموا في ليلَه	كي النّصر كيف الموتْ في محرابك
وتَبقى بعَدْ ظلمه تقولْ فتيلّه	وْيَسمعْ اللّى خانكْ صكيل انيابكْ

مـا مـن خـايــنْ	تاجرْ وسَمْسرْ، قال: ما نى باينْ
وقدمْ تقاريره بْغير قراين	وْ ناسي نهار يتمَ فيه حسابكْ
ويبقى مغير يموج وجهَه شاينْ	ويقول لكْ رميَّه جيتْ بين اجنابكْ

يا حَـمـالَــه	ويا صـابرَه في حكم هـا العَمالَه
يا ما سْمَعْتي منْ كلامْ رزالَه	كوري وْكوبي يضرْبوا بحرابكْ
وْلا سبدَ من ثورَةْ تريس زعالَه	يْخلُّوا رمايمْهم فلا لذيابكْ

يَبقى لْطامْ قبايلْ	على كلّ عاتى يرتعدْ م الجّايلْ
وْيبقَى مْعمر فيه سرْجَه مايلْ	وْيعْمد الوادى الْحَمّر، ما يَشْقَى بكْ
ويجى لعزوته، ملا عليك عمايل	طالب عَناهمْ، والعنا متْشابكْ

آصحاب العنا المسامى	خَشّاشة النّار اللّى سناها حامى
ما يَقدروا وَقْتا يجيهمْ رامى	يْقولوا: عناكْ ثقيلْ، مرّ شرابَكْ
ويجي شيخْهم كيف العْقاب الدّامي	ويْقول له نْسينا خستَكْ وْخرابَكْ

واكمل "شاعر الجنوب" القصيدة واصفاً إنطلاقة العمل الوطني من أجل الخلاص والحرية...

يــا لـيبيـا قَرَّرنا	وْيا ليبْيا واجد عليك صبرنا
ويا ليبيا حالك اليوم جبرنا	يْهون كلّ غالى في سبيل ترابك
يا ليبيا يا بَرنا وْ بحرنا	عازمْين بنخَلّصْ مْعاه حْسابك
يـا ليبيا كان الكريم نصرنا	نزيلوا اللي سكّرْ جميع ابوابك
انْ شالله ينفتْحَنْ يزول كدَرْنا	وْيَصْفى، بعدْ غَتَّر سْنين، شرابك
حتى ان كان في الْماضى حْنا قَصَّرنا	مْعاك يا حَنُونه، نِينْ طال عذابك
نسْحابوه بيرجع بعد فكرنا	لقِيناهْ متْمادى عَلَيه خرابك
اليوم ناوْين نحرروا موكرنا	من وغدْ طاغى وْيفرحوا شيّابك

يـا لـيبيـا قَرَّر شبابك كلَّـه	في الوطنْ والخارج، لْيا راد الله
يْرَيحوكْ من حكمه عديم الملَّه	اللَّى للشيوعيَّه فريسه جابك
غْويثاهْ يا حَنّا عليك اسْم الله	تَبْدى ملْعبه للْهبلْ، ما نحْسابك

يـا لـيبيـا قَرَّر شباب وْ شايب	ومعاهم آشراف الجيش ما حد غايب
يبُوا سحقْ من لابس ثياب التّايب	مُسيلْمه الدّجال، ويش جوابك؟
وراه الكتاب الْخضَرْ يقْعد سايب	يرْموه في الكْناسه يا امّنا طلابك
اللّى فيه جاب لْنا جميع مصايب	وباح كلّ ما حَرمْ الله في كْتابك

يـا لـيبيـا قَرَّر احرار بلادي	مْن جْدير لمْساعد حْضور عَوادي
وْما نتْركوا الجنوب فيه اجْوادى	يْهدوا على السّامر نهار عْطابك
حال البْلاد اليوم حال العادى	في كلّ ترْكينّه عزاها رابك
يْديكمْ مْعانا نسحقوا للْحادى	ينظاف وطنْنا وتنْبت زهور اعْشابك

يـا لـيبيـا قَرَّرْ وْ قام بْدوره	ورفَض وضع منَّه للبلاد ضروره
بْصوت حرّ في الخارج مْشكّل ثورَه	بْهم ابْشرى، وْشيلي عَنا غيّابك
رجالك اللّى بيهم زمان فخوره	بالدّمَ في الماضى رووه تْرابك
ما يْوانْسوا تَبْدى حْذاهم عورَه	قْلال الْمذاهب سالْبين ثْيابك
متْفائله خلّك بْهم مَسْروره	ولا تيَّسي منْهم تْسدى بابك
وْبعد الظّلام الفجر يشْعل نُوره	وْدقى طْبول الفرحْ جاك منابك
وْوتّي زهور و ورد يا الصّبوره	جوك الضنا جلّوا عليك ضبابك
واللّى قبلْ منَّه في صغا مَقهورَه	يَنْدَمْ بعَدْ يصْدر عليه عقابك
وْيعدمْ كْتابه وْ ينشطب دستُوره	اللّى يا حَنونَه للْمهازل جابك

للشاعر المرحوم الحاج محمد السيفاط

Return