للشاعر: الأجدابي
يللي طلقت اهتاف عرض وطول
اليوم مبخس للناس ايش اتقول ؟!!
ايش اتعل ؟
لاعاد طزك بلسان اتبل
ولاعاد صقرك ياغشيم ايجل
امهمبر .. امفرش عالوطا مذلول
ْهتافك وين ؟
امهوط .. امكوط..ماايريد زنين
اوين الفخر.. هللي صلاح الدين
اتريد همته.. فارغ على المشغول !!!
وين دليفك؟
وكسرة اخشوم اعداك في تستيفك
دار الفلك.. ثاريت هللي كيفك
عالكذب مدمن شبهة المسطول
وين اهتافك ؟
منحاش قايدك وثق جميع اكتافك
لاعاد صوت ايريد ..قيسه عافك
عيفة نبيح الكلب وين ايبول !!!!
وين اعياطك ؟
اللي في ((المثابة)) فاح طلق اشياطك
نحساب جاك الغزو.. شلت احلاطك
ثاريتها ..هيصة اوحود ابغول !!!
وين قبضة يدك ؟
عالي هديرك نين واصل حدك
لاخط موت حذاه .. راقد جدك
لاللتصدي ..كان تاق اسطول !!!
ليش اتهاطي ؟
بعد هللي صار.. راسك واطي
من قبل جدك شال غيرشناطي
مع ايطالياعلق... وتما صول!!!
قيسك ناسي
ماضي التجارب في الزمان القاسي
ايام بوك يلق ..كان ايساسي
ويحلف براس ((إدريس)) كان ايطول !!! (1)
وين القاعة ؟
وباقي الشلة الضاله البرطاعة
امغير في المحافل صايلة قرقاعة
ويوم التحدي.. امجهزين اطبول !!!
تفوه عليكم..
يللي رفعتوا بالهتاف ايديكم
وبخسه كبيرة غالقه ناديكم
امسوقر الطرح.. وقافله بالجول !!!!
(1) اشارة الى حلف اليمين برأس سيدى إدريس إبان حكم المغفور له الملك إدريس السنوسي.